Khatvei lai in, a zawng mahmah tangvalno khatin a hau mahmah nungakno khat ngaih cih takin ngai kha hi. Tangvalno pen cing kisa hetlo a, ahizongin ka ngaihna thu pen theisak nuam limlim ing ci-in a hangsanna teng kaikhawm in numei kiangah a ngaihna thu gen hi.
Numei in, “ na kha sum san pen kei nisim sum zat (pocket money) tawh kikim lel hilo hiam? Nong ngaihna thu nong gen ngam zong hang ong sa ing… nang tawh a kituak khat na zong zaw ve maw…” ci-in paisan ziau hi.
Tangval in pen sih ngaihin a ngaih hi a, a kammal zaktein a lungsim nasak mahmah hi.
Hunte hong pai in… nikhat pen shopping mall ah hong kituak vat uh hi.
Numei mahin, “ Dam maw lawm? I kimuh khak lungdam si e..,. bang khat maw, na theih mawkmawk dingin hong gen leng… ka pasal kha sum pen $17000 khawng hi. Nang a sangin bel tam zaw sam in teh maw. Thamlo in, amah pen dik mahmah a, zong hong itbawl siam mahmah hi.”na ci hi.
Hih thu in tangvalpa lungsim nasak mahmah kik hi. Tua laitakin a pasal hong pai a, tangvalno pen hong muh ciangin….
“ Eh boss, nang lah na hi a..,. hipen ka zi hi ei…” ci a, a zi kiangah, “ Ngaih aw, amah pen ka nasepnapa hi. Kei pen ama hong sawl na bangbang in a ta lel hing. Tua ciang…hibangin a tangval lai na hang pen, a tangval tungin ngaih khat na nei ngei a, ahizongin a zawn luat manin tanlawh hi. Tun bel ahihleh, a deihdeih a tel thei ta hi. Tua nungak in bel hih khial mahmah sam aive…” ci-in gen a, a zi pen daicip hi.
Tua hi a, mi khawng mawk simmawh khakloh ding hi. Tuni a I om bangin ki-om denlo ding hi. I dinmun uh pen khuahun bangin a kikhel laklak thei hi cih phawk gige in mite tungah siattat ding kidawm ni.
@tg.Samuel
No comments:
Post a Comment